Shqip

DOLI NGA SHTYPI LIBRI “ISLAMOFOBIA NË ZVICËR”

Në gusht të këtij viti, doli nga shtypi libri më i ri i autorit Mr. Feim Dragusha, me titull “Islamofobia në Zvicër”. Libri është përgatitur në tri gjuhë; anglisht, gjermanisht dhe shqip. Në këtë libër autori ka përmbledhur rastet në të cilat është shfaqur islamophobia në Zvicër dhe është munduar t’i analizoj proceset legjislative të cilat çuan në ndalimin e ndërtimit të minareve në shtetin Helvetik.
Libri i autorit Feim Dragusha është vlerësuar nga Prof. Dr Malkhaz Songulashvili, i cili është Peshkop i Tiblisit në Gjeorgji;
“Punimi i Imamit Feim Dragusha është shkruar në vitin 2013, gadi dhjetë vjet me parë, por punimi nuk e ka humbur rëndësinë e tij, në fakt ky punim është më i rëndësishëm se dhjetë vjet më parë. Punimi është shkruar nga këndvështrimi i vëzhgimit të pjesëmarrësve, gjë që e bën atë interesant dhe me vlerë në aspektin akademik. Autori distancohet emocionalisht nga subjekti i kërkimit të tij për të qenë sa më i ekuilibruar dhe objektiv. Analizat e tij janë të kujdesshme dhe të ndjeshme. Në një paragraf hyrës ai shpjegon se si muslimanët u vendosën në Zvicër si punëtorë të huaj nga vende të ndryshme dhe refugjatë nga vendet ballkanike të cilat dikur ishin përfshirë nga lufta. Këta të huaj sot përfaqësojnë mbi 6% të popullsisë së vendit.
Më pas ai fokusohet në çështjet që kanë të bëjnë me popullatën muslimane, e cila shpesh është përballur me “racizëm, islamofobi dhe me diskriminim” edhe për faktin që atyre u lejohet zyrtarisht të praktikojnë lirshëm fenë e tyre për sa kohë që ata mbajnë profil më të ulët si në aspektin social, ashtu edhe në aspektin fetar.
Autori është në gjendje të vërë në dukje se nga vijnë ndikimet diskriminuese: media, partitë politike, ligjëvënësit si në nivel kombëtar ashtu edhe në atë kantonal. Autori po ndan përvojën e tij personale në luftën kundër fanatizmit kulturor, fetar dhe social duke nxitur mjete arsimore, sociale, dhe mjete të tjera për të luftuar diskriminimin dhe për të mbrojtur integrimin dhe pjesëmarrjen e plotë të anëtarëve të komuniteteve muslimane në jetën e vendit ku ata jetojnë.
Punimi është shkruar me një stil të mirë, të lexueshëm dhe në mënyrë implicite fton lexuesin të reflektojë për çështjet e diskriminimit, jo vetëm në Zvicër, por edhe në pjesë të tjera të botës.
Islamofobia si një frikë, paragjykim dhe urrejtje ndaj individëve muslimanë ose shprehje materiale e traditës fetare muslimane (xhamitë, minaret, libri i shenjtë; kur’ani) çon në provokim, armiqësi dhe ngacmim të intolerancës, abuzim, nxitje dhe frikësim të qytetarëve të pafajshëm në çdo vend, prandaj është thelbësore ta luftojmë atë pa frikë dhe favore.
Në cilësinë e klerit të krishterë, do të thosha se në luftën kundër islamofobisë, muslimanët përfshirë këtu dhe prijësit e tyre (imamët) si dhe laikët, nuk duhet të lihen të vetëm në ato vende që janë të dominuara nga të krishterët. Si rrjedhojë, kleri i krishterë duhet të jetë në ballë në luftën kundër fanatizmit.
Unë personalisht u kërkoj falje të gjithë vëllezërve dhe motrave të mia muslimane për të gjithë diskriminimin që duhet të durojnë në emër të fesë, kulturës dhe traditës së krishterë. Ju lutem që t’na falni!
Në fund, autorit të librit, Imamit Feim Dragushës dhe kolegëve të tij, i uroj të gjitha të mirat në luftën e tyre për drejtësi sociale, barazi dhe harmoni fetare si në Zvicër ashtu edhe në pjesën tjetër të Evropës.
Libri “Islamofobia në Zvicër” është vlerësuar gjithashtu edhe nga Akademik Feti Mehdiu, i cili ndër të tjera thotë:
“Tezat që i paraqiti imami Feim Dragusha, dhe i arsyetoi para pjesëmarrësve që përfaqësonin 12 qytete të Evropës, sigurisht që tregon për një strukturë laramane profesionale dhe rajonale, për të dhënë kurajë që zotërinë Dragusha ta uroj dhe nxis që këtë kontribut ta bëjë publik, për t’i shërbyer një opinioni sa më të gjerë, sado që është i kufizuar nga ana territoriale – islamofobia në Zvicër. Këtë kufizim e kuptoj për shkak të shtrirjes së veprimit fizik të imam Feim Dragushës, dhe kam shpresë se ky model i ballafaqimit me islamofobinë, në vende e rrethana konkrete, vetëm me të vërtetën përballë islamofobisë mund të triumfojë dhe, me paraqitjen e realitetit thelbësor islam, duke ia tharë rrënjët islamofobisë. Kjo metodë duhet të ndiqet edhe prej të tjerëve, secilit në vendin konkret dhe me masa konkrete, duke u ndihmuar edhe me shkrimin e priftit Theofan Stilian Noli, me titull “Lëvizja panislamike në Misir”, të cilin shkrim ai e pati botuar qysh në korrik të vitit 1906, në gazetën “Kombi”.
Libri ka gjithsej 107 faqe dhe është botuar në shtypshkronjën “Printing Press” në Prishtinë me një tirazh prej 1000 copë. Numri i ISBN-së është: ISBN 978-9951-836-58-6.

Shqip

XHAMIA INTERNACIONALE “ES-SELAM“ NË QYTETIN WIL – ST.GALLEN

Në qytetin e bukur të Wilit, (Kanton St. Gallen) gjendet një xhami e bukur, e cila është themeluar në qershor të vitit 2008 nga disa vëllezër shqiptarë.
Xhamia është e veçantë përshkak se është e vetmja xhami në Zvicër në të cilën falën besimtarët myslimanë nga 28 nacionalitete të ndryshme nga e mbarë bota. Xhamia ka një sipërfaqe prej 350 metrave katror. Posedon faltoren për gram e hyrje të veçantë, kuzhinën për shtruarjen e iftareve dhe aktiviteteve të tjera dhe disa parkingje për vetura. Ligjëratat e xhumasë mbahen në gjuhën arabe dhe gjermane dhe imam në këtë xhami është Makbule ef. Idrizi.
Makbul Idrizi – KUADER I EZ-HERIT
Makbul ef. Idrizi është një imam i zellshëm. U lind me 28 dhjetor 1979 në fshatin Sllatinë, komuna e Tearcës – Tetovë. Shkollën fillore deri në klasën e pestë e kreu në vendlindje, dhe më pastaj ai shpërngulet në Zvicër për t’iu bashkangjitur prindërve të tij, respektivisht në Sirnach, Kantoni Thurgau.
Pas përfundimit të shkollimit në Zvicër, ishte dëshira e Allahut që ai të njihet me disa vëllezër nga Maroku dhe Tunizia, të cilët ishin pjesë e xhematit Teblig.
Duke parë përkushtimin e tyre në thirrjen islame, Makbul Idrizi së bashku me ta udhëton për në Indi dhe Pakistan për t’u njohur me dijetarë dhe profesorë nga bota arabe dhe islame.
Gjatë qëndrimit të tij gjashtë mujor në Indi, pati fatin që të takohej me disa dijetarë nga Egjipti, të cilët e ftuan që t’i ndjek studimet në Universitetin Al-Azhar, një ndër Universitetet me të vjetra në botë.
Duke e ditur se në Zvicër nuk kishte Medrese Islame, Makbul Idrizi u detyrua që për katër vite me radhë t’i ndjek mësimet në Medresenë e Ez-herit, në të cilët tregon Imami që brenda vitit kanë qenë 17 lëndë mësimore, që të gjitha në gjuhën arabe.
Nuk ka dyshim se kjo ka qenë një sfidë shumë e madhe për një nxënës shqiptar që ka filluar mësimet në Tetovë në gjuhën shqipe, pastaj i ka vazhduar ato në Zvicër në gjuhën gjermane dhe nga zelli i madh për të nxënë dije islame, arrin që në afat rekord të mësoj gjuhën arabe dhe me sukses të përfundoj Medresenë e Mesme të Ez-herit për të vazhduar studimet Bachelor gjithashtu në Universitetin e Ez-herit, Departamenti për Drejtësi Islame (Sheriat), të cilat i përfundoi në vitin 2012.
Në vitin 2012 Makbul ef. Idrizi kthehet në Zvicër për t’i shërbyer xhematit në qytetin e Wilit, por kësaj radhe ai kthehet i pajisur me një Diplomë nga një Universitet me renome Ndërkombëtare, siç është Universitet i Az-harit.
Siç theksuam më lartë, Makbuli kishte shërbyer Imam edhe gjatë kohës sa ishte student në Egjipt, e veçmas gjatë pushimeve verore, ai i përkushtohej xhamisë dhe da’vetit.
STUDIMET NË NIVELIN MASTER
– Dega Fikh el-Mukaren
Duke parë sfidat e mëdha me të cilat ballafaqohen shumë xhami në Zvicër përshkak të mënyrës se faljes, pasi që në Zvicër ka myslimanë nga vende të ndryshme të botës, në vitin 2022, imami i xhamisë Es-Selam, Makbul ef. Idrizi regjistroi magjistraturën gjithashtu në Universitetin Al-Azhar, në fushën e Jurisprudencës Islame; Fikh el-Mukaren, dhe tani është në përfundim të magjistraturës.
Kjo shkencë e Fikhut në Universitetin e Ez-herit është futur në kurrikulë që nga viti 1950, edhe për faktin se si fushë dijetarët janë marrë me të para 1000 viteve, siç është Ibën Kudame, andaj konsiderohet një degë e re për xhematin e Zvicrës dhe shumë e dobishme për xhematin ku jetojnë dhe veprojnë, sepse jo të gjithë e njohin shkollën e tyre juridike (medh’hebin), pasi që në xhaminë Internacionale në Will, në të cilën shërben Imami Idrizi, aty mund të shohësh që xhemati është i përzier dhe është e natyrshme t’i shohësh duke u falur konform medh’hebit të tyre, me fjalë të tjera, aty xhemati i përkasin të gjitha medh’hebeve.
Imami Makbul ef. Idrizi e zgjodhi këtë fushë për ta studjuar, sepse ai përgjatë viteve sa kishte punuar si imam, kishte parë fanatizmin ndaj medh’hebeve, jo vetëm tek shqiptarët, por edhe të shumë nacionalitete të tjera te besimit islam, për të mos thënë se kjo dukuri është prezente edhe tek disa hoxhallarë edhe sot e kësaja dite.
Studimi i Fikhut Krahasimtar (Fikhul Mukaren), studentit i mundëson që të njoh argumentet dhe metodologjinë e të gjitha shkollave juridike islame, si rrjedhojë, ai zgjeron njohuritë e tij duke e bërë atë me të drejtë, me të ekuilibruar dhe më largpamës në trajtimin e çështjeve fetare, e mbi të gjitha studentin e edukon që të respektoj mendimin e palës tjetër dhe kësisoj ai mund t’i shërbej xhematit me urtësi, sinqeritet dhe t’i flas me gjuhën e argumentit, e assesi me gjuhën e urrejtjes dhe fanatizmit.
BASHKËPUNIMI I IMAMIT ME ORGANËT KOMUNALE
Xhamia «Es-Selam» që nga viti 2012, e deri me sot zyrtarisht përfaqësohet nga Imami Mr. Sci. Makbul ef. Idrizi si dhe kryetari Shkelqim Bajrami. Xhamia ka arritur të realizoj një sërë projketesh me organet komunale, të cilat janë në dobi të shoqërisë dhe komunitetit myslimanë në qytetin e Wil-it.
Imami ftohet zyrtarisht në mbledhjet e organizuara nga Komuna dhe me pasuesit e feve të tjera, respektivisht nga kisha Katolike dhe kisha Protestante.
Xhamia është e hapur prej namazit të Sabahut deri në kohën e Jacisë.
Vlen të përmendët se përgjatë muajit te bekuar të Ramazanit, në këtë xhami iftari shtrohet për çdo ditë dhe namazi i teravive falet me hatme.
Imami është i hapur për dialog me të gjitha komunitetet dhe i respektuar nga zyrtarët komunalë për kontributin e tij dhënë qytetit të Wilit, një gjë që është dëshmuar edhe përmes shkrimeve nëpër gazeta të shkruara dhe elektronike.
✍️ Feim Dragusha
04.07.2026
Wil, St. Gallen – Zvicër